கோலாலம்பூர்: கடந்த மாதம் கைது செய்யப்படுவதைத் தவிர்க்க முயன்றபோது மோட்டார் சைக்கிள்களில் வந்த இரு போலீசார்கள் மீது திருடப்பட்ட காரை கொண்டு மோதியதற்காக கார் திருடனுக்கு செஷன்ஸ் நீதிமன்றம் இரண்டு ஆண்டுகள் சிறைத்தண்டனை விதித்தது. குற்றத்தை ஒப்புக்கொண்ட லீ சூன் ஹெங் (45) என்பவருக்கு நீதிபதி சித்தி ஷகிரா மொஹ்தாருடின் தண்டனை விதித்தார். செப்டம்பர் 23ஆம் தேதி லீ கைது செய்யப்பட்ட நாள் முதல் தண்டனையை அனுபவிக்க உத்தரவிட்டார்.
செப்டம்பர் 23 அன்று மதியம் 12.50 மணியளவில் ஜாலான் செகாம்புட்டில் உள்ள போக்குவரத்து விளக்கில் முறையே 36 மற்றும் 28 வயதுடைய இரண்டு போலீஸ்காரர்கள் மீது திருடப்பட்ட காரை மோதியதாக லீ மீது குற்றம் சாட்டப்பட்டது. குற்றவியல் சட்டத்தின் பிரிவு 307 இன் கீழ் கொலை முயற்சிக்காக அவர் மீது குற்றம் சாட்டப்பட்டது. இது குற்றம் நிரூபிக்கப்பட்டால் அதிகபட்சமாக 10 ஆண்டுகள் சிறைத்தண்டனையும் அபராதமும் விதிக்கப்படும். வழக்கின் உண்மைகளின்படி, இரண்டு காவல்துறையினரும் லீ அவர்கள் மீது மோதுவதற்கு முன்பு அவரைக் கைது செய்ய முயன்றனர்.
முன்னதாக, துணை அரசு வழக்கறிஞர் நிட்சுவான் அப்த் லதிப், குற்றத்தின் தீவிரம் மற்றும் காரின் திருட்டு ஆகியவற்றைக் கருத்தில் கொண்டு தகுந்த தண்டனையை கோரினார். திருடப்பட்ட காரை ஓட்டியதற்காக குற்றம் சாட்டப்பட்டவர் ஓராண்டு சிறைத்தண்டனையும் அனுபவித்து வருகிறார். எனவே குற்றவாளிகளுக்கு உரிய தண்டனை வழங்க வேண்டும் என்றார்.
லீ சார்பில் ஆஜரான தேசிய சட்ட உதவி அறக்கட்டளையின் வழக்கறிஞர் சிம்ரெட் சிங், தனது வாடிக்கையாளர் ஏழை குடும்பத்தில் இருந்து வந்தவர் என்ற அடிப்படையில் குறைந்தபட்ச சிறைத்தண்டனையை கோரினார். எனது வாடிக்கையாளர் தான் செய்த குற்றத்திற்காக நீதிமன்றத்தில் மன்னிப்பு கேட்டார். மேலும் அவருக்கு ஒரு காதலியும் எட்டு வயது குழந்தையும் உள்ளனர். அவருக்கு இன்னும் திருமணம் ஆகவில்லை. எனவே எனது கட்சிக்காரருக்கு குறைந்தபட்ச சிறைத்தண்டனையை பரிசீலிக்க வேண்டும் என்று வழக்கறிஞர் கோரினார்.
