கோலாலம்பூர்:

மலேசியாவில் பிறந்த கல்வியாளர் பேராசிரியர் ஜேக்கப் ஜார்ஜ், இங்கிலாந்தின் மருந்துகள் மற்றும் சுகாதாரப் பொருட்கள் ஒழுங்குமுறை நிறுவனத்தின் (MHRA) முதல் தலைமை மருத்துவ மற்றும் அறிவியல் அதிகாரியாக நியமிக்கப்பட்டு வரலாறு படைத்துள்ளார்.

கிள்ளானின் புக்கிட் ராஜா தோட்டத்தில் பிறந்து, வளர்ந்த அவர், இருதய மருத்துவத்தில் சர்வதேச அளவில் குறிப்பிடத்தக்க பங்களிப்பை வழங்கியுள்ளார்.

“இந்த நியமனம் எனக்கு பெருமையாக உள்ளது; இது மலேசிய வெளிநாட்டு சமூகத்தின் வலிமையையும் பிரதிபலிக்கிறது,” என்று அவர் பெர்னாமாவிடம் தெரிவித்தார்.

50 வயதான பேராசிரியர் ஜார்ஜ், ஐரோப்பிய உயர் இரத்த அழுத்த நிபுணராக அங்கீகரிக்கப்பட்டுள்ளார்.  “UK முழுவதும் மக்கள் தினசரி பயன்படுத்தும் மருந்துகள், தடுப்பூசிகள் மற்றும் சுகாதார தொழில்நுட்பங்களின் பாதுகாப்பு மீது MHRA-வின் நேரடி தாக்கம் மிகப் பெரிது. நோயாளி பராமரிப்பு மற்றும் வாழ்க்கை அறிவியல் கண்டுபிடிப்புகளை மேம்படுத்த சக ஊழியர்களுடன் பணியாற்ற ஆவலாக இருக்கிறேன்,” என்றார்.

MHRA வெளியிட்ட அறிக்கையில், பேராசிரியர் ஜார்ஜ் 2026 ஜனவரி 5 முதல் லண்டன் மற்றும் ஹெர்ட்ஃபோர்ட்ஷையர் அலுவலகங்களில் பணியாற்றுவார் என்று கூறப்பட்டுள்ளது. மேலும், ஸ்காட்லாந்தில் தனித்தளத்தை பராமரித்து, MHRA நிறுவனம்  ஒழுங்குமுறை அமைப்பாக இருப்பதை உறுதிப்படுத்துவார் என தெரிவிக்கப்பட்டது.

கிள்ளானில் உள்ள SRK (2) ஜாலான் பத்து திகா மற்றும் ஆங்கிலோ-சீனப் பள்ளிகளில் கல்வி பயின்ற ஜார்ஜ், “நான் பெருமைமிக்க சிலாங்கூர்வாசி! எனது ஆசிரியர்கள் அனைவரும் சிறந்தவர்கள்,” என்று கூறினார்.

தற்போது அவர் டண்டீ பல்கலைக்கழக மருத்துவப் பள்ளியில் இருதய மருத்துவம் மற்றும் சிகிச்சைப் பேராசிரியராகவும், NHS டெய்சைடில் இருதய ஆபத்து சேவைக்கான மருத்துவத் தலைவராகவும் உள்ளார். அவர் ராயல் காலேஜ் ஆஃப் பிஜிசியன்ஸ் (எடின்பர்க்) மற்றும் ஐரோப்பிய கார்டியாலஜி சொசைட்டியின் ஃபெலோவாகவும் பணிபுரிகிறார்.