கோலாலம்பூர்:

கோலாலம்பூர்–ஜோகூர் இடையே நீண்டநாள் எதிர்பார்க்கப்பட்ட மின் ரயில் (Electric Train Service – ETS) சேவை அடுத்த மாதம் டிசம்பர் 12ஆம் தேதி அதிகாரப்பூர்வமாகத் தொடங்கப்படவுள்ளதாக போக்குவரத்து அமைச்சர் அந்தோனி லோக் அறிவித்துள்ளார்.

அமைச்சர் கூறியதாவது, இந்த புதிய ரயில் சேவை படிப்படியாக விரிவுபடுத்தப்பட்டு, பின்னர் பாடாங் பெசார் (Padang Besar) மற்றும் பட்டர்வொர்த் (Butterworth) பகுதிகளுக்கும் இணைக்கப்படும். தூரப் பகுதிகளுக்கு தொடக்கநிலையில் நாள்தோறும் இரண்டு ரயில் சேவைகள் மட்டுமே இயக்கப்படும் என்றார்.

ஜோகூர்–கோலாலம்பூர் கூடுதல் ரயில்கள்

ஜோகூர்–கோலாலம்பூர் பகுதிகளில் பயணிகளின் எண்ணிக்கை அதிகரித்துவருவதால், அந்த பாதையில் கூடுதல் ரயில் சேவைகளைச் சேர்க்க அமைச்சகம் திட்டமிட்டுள்ளதாக லோக் தெரிவித்தார்.

இந்தப் பாதையில் ஒருவழிப் பயண நேரம் 3.5 மணி முதல் 4.5 மணி நேரம் வரை இருக்கும். மேலும், விமானச்சீட்டுகளை விட ரயில்சீட்டின் விலை பயணிகள் ஏற்றுக்கொள்ளும் வகையில் குறைவாக இருக்கும் என அவர் உறுதியாக தெரிவித்தார்.

மாமன்னர் தலைமையில் தொடக்க விழா

மலேசிய மாமன்னர் சுல்தான் இப்ராஹிம் சுல்தான் இஸ்கண்டர், டிசம்பர் 11ஆம் தேதி ஜோகூரில் புதிய ETS சேவையை அதிகாரப்பூர்வமாகத் தொடங்கி வைக்க உள்ளார்.

இந்த ரயில் திட்டம் முதன்முதலாக 2011ஆம் ஆண்டு அறிவிக்கப்பட்டது.

அதனைத் தொடர்ந்து, 2016ஆம் ஆண்டு 2.14 பில்லியன் அமெரிக்க டாலர் செலவில் கட்டுமானப் பணிகள் தொடங்கப்பட்டன.

கட்டமைப்பு மேம்பாட்டில் முக்கிய மைல்கல்

இந்த மின் ரயில் சேவை செயல்படத் தொடங்குவதன் மூலம், ஜோகூர் மற்றும் தலைநகர் கோலாலம்பூர் இடையேயான போக்குவரத்துத் திறன் அதிகரிப்பதோடு, தெற்குப் பகுதியின் பொருளாதார வளர்ச்சிக்கும் இது பெரிதும் உதவக்கூடும் என நிபுணர்கள் மதிப்பிடுகின்றனர்.