மியான்மரில் பலத்த ராணுவப் பாதுகாப்பிற்கு மத்தியில் இன்று காலை 6 மணி முதல் பொதுத்தேர்தல் வாக்குப்பதிவு விறுவிறுப்பாகத் தொடங்கி நடைபெற்று வருகிறது. ராணுவ ஆட்சிக்கு எதிராகப் பல குழுக்கள் போராடி வரும் சூழலில், இந்தத் தேர்தல் ஒரு முக்கியத் திருப்புமுனையாகப் பார்க்கப்படுகிறது. முக்கிய எதிர்க்கட்சிகள் இந்தத் தேர்தலைப் புறக்கணித்துள்ளன. ஜனநாயக ரீதியாகத் தேர்ந்தெடுக்கப்பட்ட ஆங் சான் சூகி சிறையில் இருக்கும் நிலையில், இந்தத் தேர்தல் நேர்மையானது அல்ல என அமெரிக்கா மற்றும் ஐரோப்பிய நாடுகள் விமர்சித்துள்ளன. இருப்பினும், சுமார் 2 கோடி மக்கள் வாக்களிக்கத் தகுதி பெற்றுள்ளனர்.
வாக்குப்பதிவு நடைபெறும் மையங்களில் ஆயுதம் தாங்கிய வீரர்கள் நிறுத்தப்பட்டுள்ளனர். சில இடங்களில் கிளர்ச்சியாளர்களுக்கும் ராணுவத்திற்கும் இடையே மோதல் ஏற்பட்டதாக இன்று காலை தகவல்கள் வெளியாகின. தேர்தலுக்குப் பிறகு மியான்மரில் அமைதி திரும்புமா என்பது கேள்விக்குறியாகவே உள்ளது.
