இந்த மாதம் முதல் மின்சாரக் கட்டணம் உயர்த்தப்பட உள்ளதாக சமூக வலைதளங்களில் பரவி வரும் தகவல்கள் முற்றிலும் தவறானவை என்று தெனாகா நேஷனல் பெர்ஹாட் (TNB) மறுப்பு தெரிவித்துள்ளது. இந்தத் தகவல்கள் பொதுமக்களிடையே தேவையற்ற குழப்பத்தையும் கவலையையும் ஏற்படுத்துவதாக டிஎன்பி தனது முகநூல் பக்கத்தில் குறிப்பிட்டுள்ளது. மின் கட்டணத்தில் ஏற்படும் எந்த மாற்றமும் ஒழுங்குபடுத்தப்பட்ட முறையான வழிமுறைகளின் படியே மேற்கொள்ளப்படும் என அந்நிறுவனம் விளக்கியுள்ளது. 

மின்சாரக் கட்டண மாற்றங்கள் 'தானியங்கி எரிபொருள் சரிசெய்தல்' (Automatic Fuel Adjustment) பொறிமுறையின் கீழ், உலகளாவிய எரிபொருள் விலைகள் மற்றும் அந்நியச் செலாவணி விகிதங்களைக் கருத்தில் கொண்டே தீர்மானிக்கப்படுகின்றன. இந்த மாற்றங்கள் அனைத்தும் எரிசக்தி ஆணையத்தால் (Energy Commission) சரிபார்க்கப்பட்ட பின்னரே நடைமுறைக்கு வரும். எனவே, பொதுமக்கள் அதிகாரப்பூர்வமற்ற தகவல்களைப் பகிர வேண்டாம் என்று கேட்டுக்கொள்ளப்பட்டுள்ளனர். 

தவறான தகவல்களைப் பரப்புபவர்கள் மீது மலேசிய தகவல் தொடர்பு மற்றும் பல்லூடக ஆணையத்தில் (MCMC) புகார் அளிக்கப்படும் என்று டிஎன்பி எச்சரித்துள்ளது. ஏற்கனவே, எரிபொருள் விலை உயர்வு குறித்து தவறான தகவல்களைப் பரப்பிய ஐந்து நபர்களிடம் எம்சிஎம்சி விசாரணையைத் தொடங்கியுள்ளது. துல்லியமான தகவல்களுக்கு டிஎன்பியின் அதிகாரப்பூர்வ இணையதளம் அல்லது வாடிக்கையாளர் சேவை மையத்தைத் தொடர்பு கொள்ளுமாறு அறிவுறுத்தப்பட்டுள்ளது.