சுமார் 45 ஆண்டுகளுக்குப் பிறகு சூப்பர் ஸ்டார் ரஜினிகாந்த் மற்றும் உலகநாயகன் கமல்ஹாசன் இணைந்து நடிக்கும் புதிய திரைப்படம் குறித்த அறிவிப்பு வெளியாகி இந்திய திரையுலகையே அதிர வைத்துள்ளது. 'ஜெய்லர்' படத்தின் பிரம்மாண்ட வெற்றிக்குப் பிறகு இயக்குநர் நெல்சன் திலீப்குமார் இயக்கும் இந்தப் படத்தில், முன்னணி நடிகை த்ரிஷா மிக முக்கியமான கதாபாத்திரத்தில் நடிக்க ஒப்பந்தமாகியுள்ளதாகத் தகவல்கள் வெளியாகியுள்ளன. த்ரிஷா ஏற்கனவே கமலுடன் 'மன்மதன் அம்பு', 'தூங்காவனம்', 'தக் லைஃப்' படங்களிலும், ரஜினியுடன் 'பேட்ட' படத்திலும் நடித்திருப்பது குறிப்பிடத்தக்கது.
தற்போது 'KHxRK' என அழைக்கப்படும் இந்தப் படத்திற்கு அனிருத் இசையமைக்கிறார். ரெட் ஜெயண்ட் மூவிஸ் தயாரிக்கும் இந்தப் படத்தின் தொடக்கக் காட்சிக்காக (Promo Video) த்ரிஷாவிற்கு சுமார் 12 கோடி ரூபாய் வரை சம்பளம் பேசப்பட்டுள்ளதாக இணையத்தில் செய்திகள் தீயாய் பரவி வருகின்றன. விஜய்யின் அரசியல் வருகையால் த்ரிஷா உணர்ச்சிவசப்பட்ட வீடியோ வைரலான அதே நேரத்தில், இந்தப் பெரிய கூட்டணியில் அவர் இணைந்திருப்பது ரசிகர்களிடையே பெரும் எதிர்பார்ப்பை ஏற்படுத்தியுள்ளது.
இந்தப் படத்தின் படப்பிடிப்பு வரும் ஆகஸ்ட்-செப்டம்பர் மாதங்களில் தொடங்க வாய்ப்புள்ளதாகக் கூறப்படுகிறது. ரஜினி மற்றும் கமல் ஆகிய இரு துருவங்களும் ஒரே திரையில் தோன்றுவது மட்டுமல்லாமல், அவர்களுக்கு இணையாக ஒரு பவர்ஃபுல் கதாபாத்திரத்தில் த்ரிஷா நடிக்கவிருப்பது படத்திற்கு கூடுதல் பலமாகப் பார்க்கப்படுகிறது. இந்தப் படம் குறித்த அதிகாரப்பூர்வ அறிவிப்புகள் மற்றும் கூடுதல் நட்சத்திரங்களின் பட்டியல் வரும் நாட்களில் ஒவ்வொன்றாக வெளியாகும் என எதிர்பார்க்கப்படுகிறது.
