சூர்யா நடிப்பில் பிரம்மாண்டமாக உருவாகியுள்ள 'கங்குவா' படத்தின் ரிலீஸ் குறித்த புதிய அப்டேட் வெளியாகி சமூக வலைதளங்களில் வைரலாகி வருகிறது. சிறுத்தை சிவா இயக்கத்தில் வரலாற்று பின்னணியில் உருவாகியுள்ள இந்தப் படம், சூர்யாவின் திரைப்பயணத்திலேயே மிக அதிக பட்ஜெட்டில் எடுக்கப்பட்ட படமாகும். நீண்ட நாட்களாக படத்தின் ரிலீஸுக்காக காத்திருந்த ரசிகர்களுக்கு, தற்போது வெளியாகியுள்ள அதிகாரப்பூர்வமான தகவல் மிகுந்த மகிழ்ச்சியை அளித்துள்ளது.
சமீபத்தில் வெளியான இந்தப் படத்தின் டீசர் மற்றும் போஸ்டர்கள் படத்தைப் பற்றிய எதிர்பார்ப்பை உலகளவில் அதிகரித்துள்ளன. கருப்பு நிற உடையில் சூர்யாவின் மிரட்டலான தோற்றம் ஏற்கனவே ட்ரெண்ட் ஆன நிலையில், தற்போது படம் அக்டோபர் மாதம் 10-ஆம் தேதி ஆயுத பூஜை விடுமுறை தினத்தில் திரைக்கு வரும் எனத் தெரிய வந்துள்ளது. இதனைத் தொடர்ந்து சூர்யா ரசிகர்கள் ட்விட்டர் மற்றும் இன்ஸ்டாகிராமில் கொண்டாட்டங்களைத் தொடங்கிவிட்டனர்.
இப்படத்தைத் தொடர்ந்து சூர்யா, இயக்குநர் கார்த்திக் சுப்பராஜ் இயக்கத்தில் 'சூர்யா 44' படத்தில் நடித்து வருகிறார். 'கங்குவா' படத்தின் போஸ்ட் புரொடக்ஷன் பணிகள் விறுவிறுப்பாக நடந்து வரும் நிலையில், படத்தின் இசை வெளியீட்டு விழாவையும் பிரம்மாண்டமாக நடத்த படக்குழு திட்டமிட்டுள்ளது. 10-க்கும் மேற்பட்ட மொழிகளில் வெளியாகும் இந்தப் படம், தமிழ் சினிமாவின் அடுத்த பாக்ஸ் ஆபீஸ் சாதனையை படைக்கும் என எதிர்பார்க்கப்படுகிறது.
