உக்ரைன் ராணுவம் ரஷ்யாவின் மாஸ்கோ பிராந்தியத்தை குறிவைத்து மிகப்பெரிய அளவில் ஆளில்லா விமானம் (Drone) மூலம் நள்ளிரவில் தாக்குதல் நடத்தியுள்ளது. இந்த தாக்குதலில் மாஸ்கோவிற்கு அருகிலுள்ள கிம்கி (Khimki) பகுதியில் வீட்டின் மீது ட்ரோன் விழுந்ததில் ஒரு பெண் பலியானார், மேலும் பொகோரெல்கி கிராமத்தில் இரண்டு பேர் உயிரிழந்தனர். ரஷ்ய தரப்பில் மொத்தம் நான்கு பேர் உயிரிழந்துள்ளதாகவும், 12க்கும் மேற்பட்டோர் காயமடைந்துள்ளதாகவும் உள்ளூர் ஆளுநர் ஆண்ட்ரே வோரோபியேவ் தெரிவித்துள்ளார். 

இந்த தாக்குதலின் போது மாஸ்கோவின் மிகப்பெரிய விமான நிலையமான ஷெரெமெட்டியேவோ (Sheremetyevo) வளாகத்திற்குள் ட்ரோன் இடிபாடுகள் விழுந்தன. அதிர்ஷ்டவசமாக இதனால் விமான நிலையத்திற்கு எந்தவித பெரிய சேதமும் ஏற்படவில்லை மற்றும் விமான சேவைகளும் பாதிக்கப்படவில்லை. அதே நேரத்தில், மாஸ்கோவின் முக்கிய எண்ணெய் சுத்திகரிப்பு நிலையத்தின் நுழைவாயில் அருகிலும் ட்ரோன் விழுந்து வெடித்ததில் சிலர் காயமடைந்தனர், ஆனால் அதன் தொழில்நுட்பக் கட்டமைப்பு பாதிக்கப்படவில்லை என மாஸ்கோ மேயர் செர்ஜி சோபியானின் தெரிவித்தார். 

மறுபுறம், உக்ரைன் மீது ரஷ்யா நடத்திய இரவு நேர ட்ரோன் தாக்குதல்களில் எட்டு உக்ரைனிய குடிமக்கள் காயமடைந்துள்ளதாக உக்ரைன் அதிகாரிகள் தெரிவித்துள்ளனர். இரு நாடுகளுக்கும் இடையேயான இந்த வான்வழித் தாக்குதல்கள் தற்போதைய போர்ச் சூழலை மேலும் தீவிரப்படுத்தியுள்ளது.