நியூயார்க் நகரின் மிட்-டவுன் மேன்ஹாட்டனில் உள்ள ஈஸ்ட் 52வது தெரு மற்றும் ஐந்தாவது அவென்யூ சந்திப்பில் கடந்த திங்கட்கிழமை இரவு 11:20 மணியளவில் ஒரு கொடூரமான விபத்து நிகழ்ந்தது. பிரையர்கிளிஃப் மேனரைச் சேர்ந்த டோனிகே கோகாஜ் (56) என்ற பெண்மணி, கார்டியர் மாளிகைக்கு முன்னால் தனது மெர்சிடிஸ் பென்ஸ் எஸ்யூவி (SUV) காரை நிறுத்தியுள்ளார். அவர் காரை நிறுத்திவிட்டு வெளியே கால் வைத்த அடுத்த நொடியே, எதிர்பாராதவிதமாக அங்கிருந்த 10 அடி ஆழமுள்ள திறந்த மேன்ஹோலுக்குள் (Utility Hole) விழுந்தார். 

அங்கிருந்த சாட்சிகளின்படி, அந்த பெண் காரிலிருந்து இறங்கி ஒரு அடி எடுத்து வைத்த உடனே திடீரென மறைந்துவிட்டதாகத் தெரிவிக்கின்றனர். அந்த மேன்ஹோலில் இருந்து வெளிவந்த கடுமையான நீராவி (Steam) காரணமாக அவருக்கு மாரடைப்பு (Cardiac Arrest) ஏற்பட்டது. சம்பவ இடத்திற்கு விரைந்து வந்த அவசரகால மீட்புக்குழுவினர் அவரை மேன்ஹோலில் இருந்து மீட்டு நியூயார்க்-பிரஸ்பைடீரியன் மருத்துவமனைக்குக் கொண்டு சென்றனர், ஆனால் அவர் ஏற்கனவே இறந்துவிட்டதாக மருத்துவர்கள் அறிவித்தனர். 

இந்த விபத்து குறித்து விசாரணை நடத்திய மின்சார விநியோக நிறுவனமான கான் எடிசன் (Con Edison), ஒரு கனரக மல்டி-ஆக்சில் டிரக் அந்தப் பாதையில் திரும்பும்போது அதன் எடையால் மேன்ஹோல் மூடி இடமாறியதை சிசிடிவி (CCTV) மூலம் கண்டறிந்துள்ளது. இது நடந்த 12 நிமிடங்களுக்குப் பிறகுதான் அந்த பெண் அங்கு காரை நிறுத்தியுள்ளார். சம்பவ இடத்தைச் சுற்றி எந்தவித எச்சரிக்கைக் கூம்புகளோ (Cones) அல்லது தடுப்புகளோ வைக்கப்படவில்லை என்பதால், இந்தத் விபத்திற்குப் பொறுப்பானவர்கள் மீது நடவடிக்கை எடுக்க வேண்டும் என்று அவரது குடும்பத்தினர் கோரியுள்ளனர்.