மலேசிய அரசாங்கத்தின் இலக்கு வைக்கப்பட்ட பெட்ரோல் மானியத் திட்டமான ‘பூடி மதானி ரோன்95’ (Budi95) திட்டத்தின் கீழ் பயன் பெறுவதற்காக, மற்றொரு நபரின் ‘மைகாட்’ (MyKad) அடையாள அட்டை எண்களையோ அல்லது தகவல்களையோ அவர்களின் அனுமதியின்றிப் பயன்படுத்துவது மிகப் பெரிய சட்டக் குற்றமாகும் என நாட்டின் நிதியமைச்சு இன்று கடுமையான எச்சரிக்கை விடுத்துள்ளது.
அண்மைக் காலமாகப் பெட்ரோல் நிலையங்களில் தங்களுக்குத் தெரியாமல் தங்களின் மைகாட் விபரங்களைப் பயன்படுத்தி மானியப் பெட்ரோல் பரிவர்த்தனைகள் செய்யப்பட்டுள்ளதாகப் பொதுமக்களிடமிருந்து வந்த தொடர் புகார்களை அடுத்து நிதியமைச்சு இந்த அதிரடி அறிக்கையை வெளியிட்டுள்ளது.
நிதியமைச்சின் கூற்றுப்படி, முறையான சட்டப்பூர்வ அதிகாரம் அல்லது அனுமதியின்றி மற்றொரு நபரின் மைகாட்டைப் பயன்படுத்துவது அல்லது வைத்திருப்பது 1990-ஆம் ஆண்டு தேசிய பதிவு விதிகளின் கீழ் (Regulation 25) கடுமையான குற்றமாகக் கருதப்படும். இக்குற்றம் நிரூபிக்கப்பட்டால்:அதிகபட்சமாக RM 20,000 வரை அபராதம், அல்லது 3 ஆண்டுகள் வரை சிறைத்தண்டனை, அல்லது இவை இரண்டும் சேர்த்து விதிக்கப்படச் சட்டத்தில் இடமுண்டு.
இந்த மானிய முறைகேட்டை உடனடியாகத் தடுக்கும் பொருட்டு, நாட்டில் உள்ள அனைத்து எரிபொருள் விநியோக நிறுவனங்களுக்கும் நிதியமைச்சு சில கடுமையான நிலையான செயல்பாட்டு நடைமுறைகளை (SOP) விதித்துள்ளது:
ஒவ்வொரு Budi95 மானியப் பரிவர்த்தனையின் போதும், வாடிக்கையாளரின் மைகாட்டை நேரில் பார்த்து, நபர் பொருந்துவதைFrontline ஊழியர்கள் (கவுண்ட்டர் ஊழியர்கள்) உறுதி செய்ய வேண்டும்.
மைகாட்டை நேரில் சரிபார்க்காமல் கணினியில் கைமுறையாக எண்களைப் பதிவு செய்து மானியம் வழங்குவது முற்றிலும் தடை செய்யப்பட்டுள்ளது. இந்த விதிகளை மீறும் பெட்ரோல் நிலையங்கள் மீது கடுமையான ஒழுங்கு நடவடிக்கை எடுக்கப்படும்.
முறைகேடு நடந்துள்ள பெட்ரோல் நிலையங்களின் ஊழியர்களுக்கு மறுபயிற்சி அளிக்கவும், கவுண்ட்டர்களில் SOP விதிகளைப் பொதுமக்களின் பார்வையில் படும்படி ஒட்டவும் உத்தரவிடப்பட்டுள்ளது. மேலும், பாதிக்கப்பட்ட உண்மையான மானியதாரர்களுக்குத் தகுந்த இழப்பீடு வழங்கவும் எரிபொருள் நிறுவனங்கள் அறிவுறுத்தப்பட்டுள்ளன.
Budi95 மானியம் பெறும் தகுதிவாய்ந்த மலேசியர்கள், தங்களின் மைகாட் தவறாகப் பயன்படுத்தப்பட்டுள்ளதா என்பதை அறிய https://www.budi95.gov.my என்ற அதிகாரப்பூர்வ இணையத்தளப் பக்கத்திற்குச் சென்று தங்களின் பெட்ரோல் வாங்கிய பரிவர்த்தனைப் பதிவுகளை (Transaction Records) சரிபார்த்துக் கொள்ளுமாறு கேட்டுக்கொள்ளப்படுகிறார்கள்.
தங்களுக்குத் தெரியாமல் தங்களின் கணக்கில் பெட்ரோல் மானியம் எடுக்கப்பட்டிருப்பது தெரியவந்தால், பொதுமக்கள் உடனடியாகப் பின்வரும் நடவடிக்கைகளை மேற்கொள்ள வேண்டும்:
சம்பவம் நடந்த தேதி, நேரம் மற்றும் சம்பந்தப்பட்ட பெட்ரோல் நிலையத்தின் விபரங்களைக் குறிப்பிட்டு உடனடியாகப் போலீஸ் புகார் (Police Report) அளிக்க வேண்டும்.
சம்பவம் நடந்த 30 நாட்களுக்குள் ‘பூடி மதானி தொடர்பு மையத்திற்கு’ (BMCC) தங்களின் புகாரை அனுப்ப வேண்டும். புகாருடன் போலீஸ் அறிக்கை நகல், அடையாள அட்டை நகல் (MyKad Copy) மற்றும் பரிவர்த்தனைப் பட்டியல் ஆகியவற்றை இணைக்க வேண்டும்.
தொடர்பு விபரங்கள் (BMCC – 24 மணி நேர சேவை): தொலைபேசி எண்: 1300-88-9595, வாட்ஸ்அப் (WhatsApp): +603-2631 4595, மின்னஞ்சல்: tanya@budi95.gov.my
பொதுமக்கள் யாரும் தங்களின் தனிப்பட்ட மைகாட் விபரங்களை எக்காரணம் கொண்டும் முன்பின் தெரியாத நபர்களுடனோ அல்லது பெட்ரோல் நிலையங்களிலோ மானியப் பரிவர்த்தனைகளுக்காகப் பகிர்ந்து கொள்ள வேண்டாம் என்றும், இதில் அரசாங்கம் எவ்வித சமரசமும் இன்றி கடுமையான அமலாக்க நடவடிக்கைகளை எடுக்கும் என்றும் நிதியமைச்சு மேலும் வலியுறுத்தியுள்ளது.
