கோலாலம்பூர், சபா ஊழல் முறைகேடு தொடர்பான குற்றச்சாட்டுகளை வெளியிடுவதைத் தடுக்க முயன்றதாகவும், மிரட்டியதாகவும் கூறப்படும் குற்றச்சாட்டுகளைத் தொடர்ந்து, மலேசிய ஊழல் தடுப்பு ஆணையத்தின் (MACC) முன்னாள் தலைமை ஆணையர் டான் ஸ்ரீ அஸாம் பாக்கி, தொழிலதிபர் ஆல்பர்ட் டெய் மீது அடுத்த வாரம் அவதூறு வழக்குத் தாக்கல் செய்யவுள்ளதாகத் தெரிவித்துள்ளார்.

இந்த விவகாரம் தொடர்பான உண்மைகளைப் பொதுமக்கள் அறிந்துகொள்வதை உறுதி செய்வதோடு, தனது நற்பெயரையும் ஊழல் தடுப்பு அமைப்பின் நற்பெயரையும் பாதுகாப்பதற்காகவே இந்தச் சட்ட நடவடிக்கை எடுக்கப்படுவதாக அஸாம் இன்று ஆஸ்ட்ரோ அவானியிடம் கூறினார். உண்மைகளைப் பொதுமக்கள் தெரிந்துகொள்ள வேண்டும். அதனால்தான் எனது வழக்கறிஞர்கள் மூலம் உடனடியாக சட்ட நடவடிக்கை எடுக்கிறேன்,” என்று அவர் கூறினார்.

அஸாமின் கூற்றுப்படி, அவரது வழக்கறிஞர்கள் தேவையான ஆவணங்களைத் தயாரித்து வருகின்றனர். மேலும் இந்த வழக்கு புதன்கிழமை தாக்கல் செய்யப்படும் என எதிர்பார்க்கப்படுகிறது. மேலும், டெய்யின் குற்றச்சாட்டுகளை அவர் நிராகரித்ததோடு, அந்தத் தொழிலதிபருடன் தான் ஒருபோதும் பேசியதில்லை, சந்தித்ததில்லை அல்லது எந்தவிதமான தொடர்புகளையும் கொண்டதில்லை என்றும் கூறினார். நான் அவரிடம் ஒருபோதும் பேசியதில்லை. அவரைச் சந்தித்ததும் இல்லை. சுமத்தப்பட்டுள்ள குற்றச்சாட்டுகளின் அர்த்தம் என்னவென்று எனக்குத் தெரியாது என்று அவர் கூறியதாகத் தெரிவிக்கப்பட்டுள்ளது.