செராஸ், தாமான் கன்னாட் பகுதியில், சுமார் RM14,000 மதிப்புள்ள தங்கச் சங்கிலி திருட்டுச் சம்பவத்தில் ஈடுபட்டதாக சந்தேகிக்கப்பட்டதை அடுத்து, போதைப்பொருள் தொடர்பான நான்கு வழக்குகள் உட்பட 20 குற்றப் பதிவுகளைக் கொண்டதாகக் கருதப்படும் உள்ளூர்வாசி ஒருவரை போலீசார் கைது செய்துள்ளனர். இந்தச் சம்பவம் ஏப்ரல் 12 அன்று காலை சுமார் 8 மணியளவில் ஒரு காபிக்கடைக்கு முன்னால் நிகழ்ந்ததாக செராஸ் மாவட்ட காவல்துறைத் தலைவர், உதவி ஆணையர் முகமது ரோஸ்டி தாவூத் தெரிவித்தார்.

பாதிக்கப்பட்டவரும் அவரது மனைவியும் உணவகத்திற்கு வெளியே காலை உணவு அருந்திக் கொண்டிருந்தபோது, ​​மோட்டார் சைக்கிளில் வந்த ஒரு ஆண் சந்தேக நபர், பாதிக்கப்பட்டவரின் தங்க நெக்லஸ் மற்றும் பதக்கத்தைப் பின்னாலிருந்து பறித்துக்கொண்டு தப்பிச் சென்றார். கிடைத்த தகவலின் அடிப்படையில், மே 24 அன்று பிற்பகல் சுமார் 2.30 மணியளவில், பூச்சோங்கில் உள்ள பண்டார் கின்ராரா, கின்ராரா 6 சாலையின் ஓரத்தில் காவல்துறையினரால் சோதனை நடத்தப்பட்டது என்று அவர் இன்று ஒரு அறிக்கையில் தெரிவித்தார். சந்தேக நபர் 30களின் நடுப்பகுதியில் உள்ள  ஆடவர் என்றும், இந்த வழக்கு தண்டனைச் சட்டத்தின் பிரிவு 392-ன் கீழ் விசாரிக்கப்பட்டு வருவதாகவும் அவர் கூறினார்.  காவல் விசாரணைக்கான மனு நிராகரிக்கப்பட்டுள்ளது.” மேலும், சந்தேக நபர் தற்போது காவல்துறை ஜாமீனில் விடுவிக்கப்பட்டுள்ளார்,” என்று அவர் கூறினார். மேற்கொண்டு நடவடிக்கை எடுப்பதற்காக விசாரணை ஆவணங்கள் முடிக்கப்பட்டுவிட்டதாகவும் அவர் மேலும் தெரிவித்தார்.