BUDI95 இலக்கு எரிபொருள் மானியத் திட்டம், மே 31, 2026 நிலவரப்படி, 14 மில்லியன் மலேசியர்களுக்குப் பயனளித்துள்ளதுடன், 11.1 பில்லியன் லிட்டர் எரிபொருளை உள்ளடக்கியுள்ளது என நிதி அமைச்சகம் தெரிவித்துள்ளது. இதன் மொத்த விற்பனை மதிப்பு RM22.1 பில்லியன் என்றும், இதில் RM11.2 பில்லியன் மானியமாக அரசாங்கத்தால் ஏற்கப்பட்டது என்றும் அது கூறியது.

மேற்கு ஆசியாவில் நெருக்கடி தொடங்கியதிலிருந்து, BUDI95 மானியச் செலவினம், 2025 ஆம் ஆண்டின் இதே காலகட்டத்துடன் ஒப்பிடுகையில், சராசரியாக மும்மடங்கு அதிகரித்துள்ளது என்றும் அமைச்சகம் மேலும் கூறியது. BUDI95 திட்டத்தின் செயலாக்கத்தை அரசாங்கம் தொடர்ந்து கண்காணிக்கும். மேலும், உதவியானது நியாயமாகவும், திறம்படவும், உண்மையிலேயே தேவைப்படுபவர்களை இலக்காகக் கொண்டும் விநியோகிக்கப்படுவதை உறுதிசெய்ய, அவ்வப்போது உரிய மேம்பாடுகளைச் செய்யும் என்று அமைச்சகம் நேற்று நாடாளுமன்றத்தின் இணையதளத்தில் வெளியிடப்பட்ட, மக்களவையின் எழுத்துப்பூர்வ பதிலில் கூறியுள்ளது.

மே 2026 நிலவரப்படி BUDI95 திட்டத்தின் மூலம் பயனடைந்த தனிநபர்களின் எண்ணிக்கை, வழங்கப்பட்ட மானியத் தொகை, விண்ணப்ப ஒப்புதல் விகிதம், மற்றும் தகுதியுள்ள அனைத்துக் குழுக்களும் உதவியைப் பெறுவதில் இருந்து விடுபட்டுப் போகாமல் இருப்பதை உறுதிசெய்ய எடுக்கப்பட்ட நடவடிக்கைகள் ஆகியவை குறித்து ரொனால்ட் கியாண்டீ (PN-பெலூரான்) அவர்களின் கேள்விக்கு அமைச்சகம் பதிலளித்தது.