தாபோங் ஹாஜி  நிறுவனத்தின் முன்னாள் தலைமைச் செயல்பாட்டு அதிகாரி ஆதி அஸுவான் அப்துல் கனி, ஒன்பது ஆண்டுகளுக்கு முன்பு ஒரு வீட்டைப் புனரமைப்பதற்காக  8,882.77 ரிங்கிட்டை செலவு செய்ததாகக் கூறப்படும் குற்றச்சாட்டை கோலாலம்பூர் அமர்வு நீதிமன்றம் விசாரணைக்கு எடுத்துக்கொண்டுள்ளது. 56 வயதான ஆதி, நீதிபதி சுசானா ஹுசைன் முன்னிலையில் இந்த மனு தாக்கல் செய்யப்பட்டது. இந்தக் குற்றச்சாட்டு, தண்டனைச் சட்டத்தின் பிரிவு 165இன் கீழ் பதிவு செய்யப்பட்டுள்ளது. இப்பிரிவு, ஒரு அரசு ஊழியர் பிரதிபலன் இல்லாமல் மதிப்புமிக்க பொருட்களைப் பெறுவதைக் குற்றமாகக் கருதுகிறது. குற்றவாளிகள் என நிரூபிக்கப்பட்டவர்களுக்கு இரண்டு ஆண்டுகள் வரை சிறைத்தண்டனையும் அபராதமும் விதிக்கப்படலாம்.

குற்றச்சாட்டின்படி, அப்போது தாபோங் ஹாஜியின் தலைமைச் செயல்பாட்டு அதிகாரியாக இருந்த ஆதி, கோலாலம்பூர், பண்டார் ஸ்ரீ டாமன்சாராவில் உள்ள ஜாலான் தஞ்சங் SD 13/4-இல் அமைந்துள்ள ஒரு வீட்டைப் புனரமைப்பதற்கான செலவு என்ற பெயரில், ஏஜி ரேகா சென். பெர்ஹாட் நிறுவனத்தின் இயக்குநர் தம்சுலாஸ்ரி இஸ்மாயிலிடமிருந்து மதிப்புமிக்க பொருட்களைப் பெற்றுள்ளார். இந்தக் குற்றம் 2017 மார்ச் 7 அன்று செய்யப்பட்டதாகக் கூறப்படுகிறது.

ஆதிக்கு எதிரான மற்ற மூன்று குற்றச்சாட்டுகளுடன் சேர்த்து இந்த வழக்கையும் ஷா ஆலம் அமர்வு நீதிமன்றத்திற்கு மாற்றி விசாரிக்க வேண்டும் என்ற மலேசிய ஊழல் தடுப்பு ஆணையத்தின்  துணை அரசு வழக்கறிஞர் இர்னா ஜூலிசா மாராஸின் விண்ணப்பத்தையும் நீதிமன்றம் ஏற்றுக்கொண்டது.

சுசானா, இரண்டு ஜாமீன்தாரர்களுடன் 50,000  ரிங்கிட் பிணைத்தொகை வழங்கி, ஆதி தனது கடவுச்சீட்டை நீதிமன்றத்தில் ஒப்படைக்குமாறு உத்தரவிட்டார். மேலும், அவர் மாதத்திற்கு ஒருமுறை புத்ராஜெயாவில் உள்ள எம்ஏசிசி அலுவலகத்தில் ஆஜராக வேண்டும் என்றும் அறிவுறுத்தப்பட்டுள்ளது. ஆதி சார்பில் வான் அஸ்வான் ஐமன் வான் ஃபக்ருதீன் ஆஜரானார். ஒன்பது ஆண்டுகளுக்கு முன்பு மூன்று வீடுகளைப் புதுப்பிப்பதற்காகச் செலவழித்த மொத்த 302,499.27 ரிங்கிட் தொடர்பான இதேபோன்ற குற்றச்சாட்டுகள் நேற்று ஷா ஆலம் அமர்வு நீதிமன்றத்தில் அவர் மீது சுமத்தப்பட்டன.