கோலாலம்பூர்: டாக்டர் ஜாகிர் நாயக்கை இந்தியாவிடம் ஒப்படைக்கப்போவதில்லை என்றும், அவ்வாறு செய்வதற்கான எந்தவொரு வாக்குறுதியையும் மலேசியா அளிக்கவில்லை என்றும் டத்தோ ஸ்ரீ சைபுதீன் நசுத்தியோன் இஸ்மாயில் தெரிவித்துள்ளார். 2010ஆம் ஆண்டு இந்தியாவுடன் கையெழுத்திடப்பட்ட நாடுகடத்தல் ஒப்பந்தத்தின் 6ஆவது பிரிவின் கீழும், 1992ஆம் ஆண்டு இயற்றப்பட்ட நாடுகடத்தல் சட்டத்தின் விதிகளின் கீழும் மலேசியாவுக்கு உள்ள உரிமைகளின் அடிப்படையில் இந்த முடிவு எடுக்கப்பட்டுள்ளதாக உள்துறை அமைச்சர் கூறினார்.

ஜாகிர் நாயக்கை நாடுகடத்துவதற்கான முந்தைய அதிகாரப்பூர்வ கோரிக்கை 2018ஆம் ஆண்டு ஜனவரி 19அன்று பெறப்பட்டது. அதனை மறுபரிசீலனை செய்யுமாறு கோரும் தூதரகக் குறிப்பு ஒன்று, இந்திய அரசாங்கத்திடமிருந்து 2020ஆம் ஆண்டு மே 29அன்று பெறப்பட்டது என்று அவர் செவ்வாய்க்கிழமை (நவம்பர் 3) நாடாளுமன்றத்தில் எழுத்துப்பூர்வமாக அளித்த பதிலில் தெரிவித்தார்.தற்போதைய நிலையில், அரசாங்கத்திற்குப் புதிய நாடுகடத்தல் கோரிக்கைகள் எதுவும் வரவில்லை.ஜாகிர் நாயக்கை இந்தியாவிடம் ஒப்படைக்க வேண்டாம் என்று மலேசியா முடிவு செய்துள்ளது; எனவே, அவரை ஒப்படைப்பதற்கான எந்தவொரு உறுதிப்பாடும் வழங்கப்படவில்லை.

டத்தோ டாக்டர் அகமது மர்சுக் ஷாரி (பெங்காலான் செப்பா தொகுதி நாடாளுமன்ற உறுப்பினர்), இந்தியாவின் நாடுகடத்தல் கோரிக்கையின் தற்போதைய நிலை என்னவென்றும், சமர்ப்பிக்கப்பட்ட ஆவணங்களும் ஆதாரங்களும் மலேசியச் சட்டத்தின் மற்றும் இருதரப்பு ஒப்பந்தத்தின் தேவைகளைப் பூர்த்தி செய்கின்றனவா என்றும் வினவியிருந்தார். செப்டம்பர் மாதம் நடைபெற்ற 18ஆவது பிரிக்ஸ் (BRICS) உச்சிமாநாட்டின் போது, ​​மலேசியப் பிரதமர் டத்தோ ஸ்ரீ அன்வார் இப்ராஹிமும் இந்தியப் பிரதமர் நரேந்திர மோடியும் ஜாகிர் நாயக்கை நாடுகடத்துவது குறித்து கலந்துரையாடியதாகத் தகவல்கள் வெளியாகியிருந்தன.