Offline
Menu
சுலாமன் சென்ட்ரலில் நபர் ஒருவர் கத்தியால் குத்திக் கொல்லப்பட்ட சம்பவத்தில் 7 பேர் கைது
By Administrator
Published on 11/17/2026 14:00
News

சபா மாநிலம், கோத்தா கினபாலுவில் உள்ள சுலாமன் சென்ட்ரலில், சனிக்கிழமை அதிகாலை 31 வயதுடைய நபர் ஒருவர் கத்தியால் குத்திக் கொல்லப்பட்டார். இந்த கொலைச் சம்பவம் தொடர்பான விசாரணையில் உதவுவதற்காக, ஏழு பேரை காவல்துறையினர் கைது செய்துள்ளனர்.

 

கோத்தா கினபாலு மாவட்ட காவல் துறைத் தலைவர் ஷாருடின் மாட் ஹுசைன் கூறுகையில், மங்காட்டால் (Manggatal) பகுதியைச் சுற்றியுள்ள பல்வேறு இடங்களில் சந்தேக நபர்கள் கைது செய்யப்பட்டதாகவும், இவர்களின் வயது 18 முதல் 30-களுக்குள் இருக்கும் என்றும் ‘பெரித்தா ஹாரியான்’ (Berita Harian) செய்தி ஊடகம் தெரிவித்துள்ளது. விசாரணையை முழுமைப்படுத்த, மேலும் சில சந்தேக நபர்களைத் தேடும் பணிகள் தொடர்ந்து நடைபெற்று வருகின்றன என்று அவர் தெரிவித்தார்.

 

முதற்கட்ட விசாரணையின்படி, அதிகாலை 4.30 மணியளவில் ஒரு உணவகத்தில், சந்தேக நபர்களில் ஒருவருக்கும் உணவு விற்பனையாளர் ஒருவருக்கும் இடையே ஏற்பட்ட கருத்து வேறுபாட்டின் போது, பாதிக்கப்பட்ட நபர் அதில் தலையிட்டுள்ளார். அப்போது அவர் கத்தியால் குத்தப்பட்டார். உடனடியாக அவரது சகோதரர் அவரை சபா பெண்கள் மற்றும் குழந்தைகள் மருத்துவமனைக்குக் கொண்டு சென்றார். ஆனால் அங்கு சிகிச்சை பலனின்றி அவர் உயிரிழந்தார்.

Comments