இந்த ஆண்டின் முதல் நான்கு மாதங்களில் சிலாங்கூரில் வணிகக் குற்றங்களால் ஏற்பட்ட இழப்புகள் 322 மில்லியன் ரிங்கிட்டை தாண்டியுள்ளதாக மாநில காவல்துறைத் தலைவர் டத்தோ ஹுசைன் உமர் கான் தெரிவித்தார். ஏப்ரல் மாதம் வரை, மொத்தம் 3,711 விசாரணை ஆவணங்கள் திறக்கப்பட்டுள்ளன. இவற்றில், 2,180 வழக்குகள் ஆன்லைன் மோசடிகள் தொடர்பானவை. அவற்றின் இழப்புகள் 58 மில்லியன் ரிங்கிட் ஆகும். மீதமுள்ள 1,531 வழக்குகள் சைபர் அல்லாத குற்றங்கள், இதன் விளைவாக 264 மில்லியன் ரிங்கிட் இழப்பு ஏற்பட்டுள்ளது.வணிகக் குற்றங்களைத் தடுக்கும் முயற்சிகளில், 1,550 மியூல் கணக்கு வைத்திருப்பவர்கள் உட்பட 1,971 பேரை போலீசார் கைது செய்துள்ளனர் என்று அவர் இன்று சினார் ஹரியனிடம் தெரிவித்தார்.
சிலாங்கூர் வணிகக் குற்றப் புலனாய்வுத் துறை (CCID) ஆள்மாறாட்டக் கும்பல்களை குறிவைத்து 11 சோதனைகளை நடத்தியதாகவும் இதன் மூலம் 52 பேர் கைது செய்யப்பட்டதாகவும் அவர் கூறினார்.தடுப்பு நடவடிக்கைகள் மற்றும் கண்காட்சிகள், பேச்சுக்கள் மற்றும் வணிகக் குற்றங்கள் குறித்த ஊடக பிரச்சாரங்கள் போன்ற வெளிப்புற முயற்சிகள் மூலம் பொதுமக்களின் விழிப்புணர்வை ஏற்படுத்துவதில் PDRM உறுதியாக இருப்பதாக அவர் மேலும் கூறினார்.பொதுமக்களுக்கு உதவுவதற்காக, புக்கிட் அமானின் CCID, ‘‘Semak Mule’ போர்ட்டலையும் உருவாக்கியுள்ளது. இதன் மூலம் பயனர்கள் எந்தவொரு கட்டணத்தையும் செலுத்துவதற்கு முன்பு தொலைபேசி எண்கள் மற்றும் பெறுநர் விவரங்களைச் சரிபார்க்க முடியும்.
