சிரம்பான்:

ரெம்பாவ் UiTM வளாகத்தில் டிப்ளோமா பயின்று வந்த இரண்டு மாணவிகள், நேற்று மாலை நிகழ்ந்த மோட்டார் சைக்கிள் விபத்தில் சம்பவ இடத்திலேயே உயிரிழந்தனர்.

மாலை சுமார் 4.00 மணியளவில், பெக்கான் லூபோக் சீனா (Pekan Lubok Cina) நோக்கிச் செல்லும் சாலையில் இந்த விபத்து நிகழ்ந்துள்ளது என்றும், உயிரிழந்தவர்கள் 19 வயதுடைய இஸ்மாவானி ஹுஸ்னா இஸ்மாயில் மற்றும் நூர் ஐன் சுலைஸ்யா ஜஹ்ரைன் என அடையாளம் காணப்பட்டுள்ளனர். இவர்கள் இருவரும் ரெம்பாவ் UiTM பல்கலைக்கழக மாணவர்கள் ஆவர் என்று, ரெம்பாவ் மாவட்டக் காவல்துறைத் தலைவர் ஹசானி ஹுசைன் கூறினார்.

மாணவிகள் இருவரும் யமஹா NVX ரக மோட்டார் சைக்கிளில் சென்று கொண்டிருந்தனர். இஸ்மாவானி மோட்டார் சைக்கிளை ஓட்டிச் சென்றுள்ளார்.

விபத்து நடந்தபோது வானிலை சாதகமாகவே இருந்துள்ளது. எனினும், சாலையில் இருந்த ஒரு வளைவில் (Bend) திரும்பும்போது, மோட்டார் சைக்கிள் எதிர்பாராத விதமாக ஓட்டுநரின் கட்டுப்பாட்டை இழந்து சாலையோரம் இருந்த பாதுகாப்புத் தடுப்புச் சுவரில் (Guard rail) பலமாக மோதியுள்ளது.

இந்த விபத்தில் தலையில் பலத்த காயமடைந்த இரு மாணவிகளும் சம்பவ இடத்திலேயே உயிரிழந்தனர்.

மாணவிகளின் உடல்கள் பிரேதப் பரிசோதனைக்காக மருத்துவமனைக்கு அனுப்பி வைக்கப்பட்டுள்ளன. இந்த விபத்து குறித்து போலீஸார் மேலதிக விசாரணைகளை மேற்கொண்டு வருகின்றனர். பல்கலைக்கழகத் தோழிகள் இருவர் ஒரே நேரத்தில் விபத்தில் பலியான சம்பவம் சக மாணவர்களிடையே பெரும் சோகத்தை ஏற்படுத்தியுள்ளது.