பிராந்திய வான்வழி எல்லைகள் மூடப்பட்டதால் தற்காலிகமாக நிறுத்தப்பட்டிருந்த ஜெட்டா மற்றும் மதினாவுக்கான விமானச் சேவைகளை மலேசியா ஏர்லைன்ஸ் இன்று (மார்ச் 4, 2026) முதல் மீண்டும் தொடங்கியுள்ளது. மிடில் ஈஸ்ட் பகுதியில் நிலவி வரும் போர் பதற்றத்தால் பயணிகளின் பாதுகாப்பை உறுதி செய்ய, மோதல் நடைபெறும் பகுதிகளைத் தவிர்த்து மாற்றுப் பாதைகள் (Alternative Routes) மூலம் இந்த விமானங்கள் இயக்கப்படுகின்றன.

இருப்பினும், தோஹாவுக்கான (Doha) விமானச் சேவைகள் மார்ச் 7-ஆம் தேதி வரை நிறுத்தி வைக்கப்பட்டுள்ளன. அங்குள்ள பாதுகாப்புச் சூழலைத் தொடர்ந்து கண்காணித்து வருவதாக விமான நிறுவனம் தெரிவித்துள்ளது. இந்த ரத்து நடவடிக்கையால் பாதிக்கப்பட்ட பயணிகளுக்குப் பயணத் தேதியை மாற்றிக்கொள்ளும் வசதி அல்லது பணத்தைத் திரும்பப் பெறும் வசதி வழங்கப்படுகிறது. தற்போதைய சூழலில் ஊழியர்கள் மற்றும் பயணிகளின் பாதுகாப்பிற்கே முன்னுரிமை அளிக்கப்படுவதாக நிறுவனம் வலியுறுத்தியுள்ளது.

தேசிய விமான நிறுவனத்தின் பிற சர்வதேச வழித்தடங்கள் வழக்கம்போல் இயங்கி வருகின்றன. மிடில் ஈஸ்ட் வான்வெளியில் நிலவும் சூழல் எப்போது வேண்டுமானாலும் மாறக்கூடும் என்பதால், பயணிகள் அவ்வப்போது தங்களது விமானப் பயண நிலையை (Flight Status) சரிபார்த்துக் கொள்ளுமாறு அறிவுறுத்தப்படுகிறார்கள்.