பட்டர்வொர்த், சுங்கை துவா (Sungai Dua) பகுதியில் உள்ள தனது வீட்டில், 52 வயதுடைய பெண் ஒருவர் மார்பில் குத்தப்பட்ட காயத்துடன் ரத்த வெள்ளத்தில் இறந்து கிடந்ததைக் கண்டு அவரது கணவர் அதிர்ச்சியடைந்தார். உயிரிழந்த பெண் மனநல சிகிச்சை பெற்று வந்தவர் என்று நம்பப்படுகிறது.

உயிரிழந்தவர் கோய் ஃபியூ சுவென் (Koay Feu Chuen) என அடையாளம் காணப்பட்டுள்ளார். அவர் ஒரு தொழிற்சாலை ஊழியர். இன்று காலை வழக்கம்போல காலை உணவு தயாரிக்க அவர் கீழே வராததால் சந்தேகமடைந்த கணவர், மேல் தளத்தில் உள்ள படுக்கையறைக்குச் சென்று பார்த்தார்.

படுக்கையறை உட்புறமாகப் பூட்டப்பட்டிருந்தது. கதவைத் திறந்து பார்த்தபோது, அவர் ரத்த வெள்ளத்தில் சடலமாகக் கிடப்பதைக் கண்டு கணவர் அதிர்ச்சியடைந்தார். இச்சம்பவம் காலை 9.30 மணியளவில் தமன் தேசா முர்னி (Taman Desa Murni) பகுதியில் உள்ள மாடி வீட்டில் நிகழ்ந்துள்ளது.

செபெராங் பிறை உத்தாரா மாவட்ட குற்றப்பிரிவு போலீசார் மற்றும் தடயவியல் நிபுணர்கள் சம்பவ இடத்திற்கு விரைந்து ஆய்வு நடத்தினர். அங்கிருந்து ஒரு கத்தியை போலீசார் கைப்பற்றியுள்ளனர்.

முதற்கட்ட விசாரணையில், உயிரிழந்த பெண் மனநல பாதிப்பிற்காகச் சிகிச்சை பெற்று வந்தவர் என்பது தெரியவந்துள்ளது.

இந்தச் சம்பவத்தில் வெளிநபர்கள் சம்பந்தப்பட்டதற்கான அல்லது குற்றச் செயல்களுக்கான எந்த அறிகுறியும் தென்படவில்லை என்று அதிகாரிகள் தெரிவித்துள்ளனர்.

மாநில போலீஸ் தலைமை அதிகாரி டத்தோ அசிஸி இஸ்மாயில், இப்போதைக்கு இச்சம்பவம் ‘திடீர் மரணம்’ (Sudden Death Report – SDR) என வகைப்படுத்தப்பட்டுள்ளதாகவும், பிரேதப் பரிசோதனை முடிவுகளுக்காகக் காத்திருப்பதாகவும் உறுதிப்படுத்தினார்.