செர்டாங் மாவட்ட துணை போலீஸ் தலைவர் சூப்பரிண்டெண்டெண்ட் ஷாநாஸ் அக்தர் ஹாஜி (Superintendent Shahnaz Akhtar Haji) இன்று காலை மாரடைப்பால் காலமானார். அவருக்கு வயது 51.

இன்று காலை சுமார் 10:00 மணியளவில் அவருக்குத் திடீர் மாரடைப்பு ஏற்பட்டதைத் தொடர்ந்து, செர்டாங் மருத்துவமனையில் அனுமதிக்கப்பட்டார். எனினும், சிகிச்சை பலனின்றி அவர் உயிரிழந்தார் என்பதை சிலாங்கூர் மாநிலப் போலீஸ் தலைவர் டத்தோ ஷாசெலி கஹார் (Datuk Shazeli Kahar) உறுதிப்படுத்தியுள்ளார்.

மறைந்த ஷாநாஸ் அக்தர் அவர்கள் மலேசியப் போலீஸ் படையில் (PDRM) சுமார் 30 ஆண்டுகள் மிகச்சிறப்பாகப் பணியாற்றியவர். அவரது மறைவு குறித்து இரங்கல் தெரிவித்துள்ள டத்தோ ஷாசெலி, “அவரது இழப்பு சிலாங்கூர் மாநிலப் போலீஸ் படைக்கு ஈடு செய்ய முடியாத ஒரு பெரிய இழப்பாகும்,” என்று உருக்கமாகத் தெரிவித்தார்.

ஷாநாஸ் அக்தரின் மறைவிற்கு அவரது குடும்பத்தினர், சக ஊழியர்கள் மற்றும் பொதுமக்கள் பலரும் சமூக வலைதளங்களில் தங்களது ஆழ்ந்த இரங்கலைத் தெரிவித்து வருகின்றனர்.