தங்காக்: வடக்கு-தெற்கு விரைவுச்சாலையின் (தெற்கு நோக்கிச் செல்லும்) 155.8 கிலோமீட்டர் பகுதியில், பலநோக்கு வாகனம் (MPV) சறுக்கி சாலை தடுப்பில் மோதியதில், தந்தை உயிரிழந்தார். அவரது எட்டு வயது மகள் படுகாயம் அடைந்தார். மூன்று குழந்தைகளை ஏற்றிச் சென்ற அந்த பலநோக்கு வாகனம் ஜோகூர் பாரு நோக்கிச் சென்று கொண்டிருந்தபோது, மாலை 5 மணிக்கு இந்த விபத்து நிகழ்ந்தது. இதில் 46 வயதான சுஃபாத் ஐனி, தலை மற்றும் உடல் காயங்கள் காரணமாக சம்பவ இடத்திலேயே உயிரிழந்தார்.
இறந்தவரின் 41 வயதான மனைவியும், பலநோக்கு வாகனத்தை ஓட்டிச் சென்றவருமான பெண் கட்டுப்பாட்டை இழந்து, நெடுஞ்சாலையின் இடதுபுறத்தில் இருந்த சாலை தடுப்பில் மோதியதால் இந்த விபத்து நிகழ்ந்ததாக தங்காக் மாவட்ட காவல்துறைத் தலைவர், கண்காணிப்பாளர் ரோஸ்லான் முகமது தாலிப் தெரிவித்தார்.
இந்த விபத்தில், வாகனத்தின் முன் இருக்கையில் பயணித்தவர் படுகாயம் அடைந்ததாகவும், சம்பவ இடத்திலேயே மருத்துவப் பணியாளர்களால் அவர் உயிரிழந்தது உறுதிசெய்யப்பட்டதாகவும் அவர் கூறினார். பின் இருக்கையில் பயணித்த, பாதிக்கப்பட்டவரின் மகள், உடல் மற்றும் முகத்தில் காயமடைந்தார். அவர் மேலதிக சிகிச்சைக்காக முவார் சுல்தானா பாத்திமா சிறப்பு மருத்துவமனைக்கு (HPSF) அவசரமாகக் கொண்டு செல்லப்பட்டார்.
விபத்திற்கான காரணத்தைக் கண்டறியும் விசாரணைகள் இன்னும் நடைபெற்று வருகின்றன. மேலும், இந்த வழக்கு 1987 ஆம் ஆண்டு சாலைப் போக்குவரத்துச் சட்டத்தின் பிரிவு 41 (1)-இன் கீழ் விசாரிக்கப்படுகிறது. இந்த விபத்து குறித்து தகவல் தெரிந்த பொதுமக்கள், விசாரணையை நிறைவு செய்வதற்காக, விசாரணை அதிகாரி இன்ஸ்பெக்டர் நூர்ஹிஸ்யாம் ஷாஃபிக் மாட் லோபாவை 013-9825324 என்ற எண்ணில் தொடர்பு கொள்ளுமாறு கேட்டுக் கொள்ளப்படுகிறார்கள் என்று தொடர்பு கொண்டபோது அவர் கூறினார்.
