குவாந்தானின் ஆயர்  புத்தே (Air Putih) பகுதியில் உள்ள வாடகை வீட்டில் மயங்கிய நிலையில் கண்டெடுக்கப்பட்ட 19 வயது மாணவியின் உயிரிழப்புக்கு பொறாமையே காரணமாக இருக்கலாம் என்று காவல்துறையினர் கருதுகின்றனர். சுல்தான் ஹாஜி அகமது ஷா பாலிடெக்னிக்கைச் சேர்ந்த அந்த மாணவியும், அவரது காதலரும் சுமார் ஓராண்டாக ஒருவரையொருவர் அறிந்திருந்ததாக குவாந்தான் காவல் துறைத் தலைவர் அஷாரி அபு சமாஹ் கூறியதாக ‘பெர்னாமா’ செய்தி வெளியிட்டுள்ளது.

பாதிக்கப்பட்ட மாணவியுடன் ஒரே வீட்டில் தங்கியிருந்த மூவரிடமிருந்தும் காவல்துறையினர் வாக்குமூலங்களைப் பதிவு செய்துள்ளதாகவும் அவர் தெரிவித்தார். இச்சம்பவம் அந்த ஜோடிக்கு இடையே ஏற்பட்ட தவறான புரிதலால் நிகழ்ந்திருக்கலாம் என்று ஆரம்பக்கட்ட விசாரணைகள் சுட்டிக்காட்டியதாக முன்னதாகவே தெரிவிக்கப்பட்டிருந்தது.

பாதிக்கப்பட்ட மாணவியின் காதலரிடமிருந்து அவசர அழைப்பு வந்ததையடுத்து காவல்துறையினருக்குத் தகவல் தெரிவிக்கப்பட்டது. அவர்கள் அங்கு சென்றபோது, மாணவி படுக்கையில் மயங்கிய நிலையில் கிடப்பதையும், அவரது  கழுத்து நெரிக்கப்பட்டதற்கான அடையாளங்கள் இருப்பதையும் கண்டனர். கொலைக்கு எதிரான தண்டனைச் சட்டத்தின் பிரிவு 302இன் கீழ் விசாரணைக்கு உதவும் வகையில், 19 வயதான அவரது காதலர் கைது செய்யப்பட்டு, அக்டோபர் 12 வரை ஏழு நாட்கள் காவலில் வைக்கப்பட்டுள்ளார்.