கோலாலம்பூர்:

கோலாலம்பூர் குடிநுழைவு துறை ஜாலான் சௌக்கிட் பகுதியில் உள்ள ஒரு மொத்த விற்பனை மையத்தில் மேற்கொண்ட ஒரு நடவடிக்கையில், 124 சட்டவிரோத குடியேறிகளை கைது செய்துள்ளது.

மதியம் 12:30 மணி முதல் பிற்பகல் 2:00 மணி வரை நடைபெறும் சட்டவிரோத வணிக நடவடிக்கைகள் மற்றும் வெளிநாட்டினர்களின் கூட்டம் தொடர்பாக பொதுமக்களின் புகார்களை தொடர்ந்து, இந்த நடவடிக்கை மேற்கொள்ளப்பட்டது என்று, குடிநுழை துறை இயக்குநர் வான் முகமட் சௌபி வான் யூசாஃப் தெரிவித்தார்.

இந்த நடவடிக்கையில் மொத்தம் 205 நபர்களைச் சோதனை செய்யப்பட்டனர், அதில் 20-29 வயதுடைய 124 ஆவணமற்ற குடியேறிகள் கைது செய்யப்பட்டனர் என்று அவர் சொன்னார்.

கைது செய்யப்பட்டவர்களில்: 59 பேர் பாகிஸ்தானியர்கள், 37 பேர் வங்காளதேசியர்கள், 12 பேர் இந்தோனேசியர்கள், 10 பேர் மியன்மார் நாட்டவர்கள்,5 பேர் இந்தியர்கள் மற்றும் தாய்லாந்து நாட்டவர் ஒருவர் என 124 பேர் அடங்கியுள்ளனர்.

ஆரம்ப விசாரணையில், பல வெளிநாட்டினர் KL (கோலாலம்பூர்) வெளியே கிளந்தான், ஜோகூர், மலாக்கா மற்றும் பினாங்கு ஆகிய மாநிலங்களில் குடியிருப்பு முகவரிகளைக் கொண்டு, பணியாளர் அனுமதிச் சீட்டு நிபந்தனைகளை தவறாக பயன்படுத்தியுள்ளதாக தெரிய வந்துள்ளது.

சிலர் விடுமுறையில் இருப்பதாகக் கூறினாலும், உண்மையில் அவர்கள் அங்கு பணிபுரிகிறார்கள் என்பது அதிகாரிகளின் நம்பிக்கை. மேலும், விசாரணையில் அவர்களை வேலைக்கு அமர்த்திய முதலாளிகளும் அடங்கியிருக்கலாம் என்றும் தெரிவிக்கப்பட்டுள்ளது.

இதற்கிடையே, கோலாலம்பூர் மாநகர மன்றம் வெளிநாட்டினரை உரிமமில்லாமல் வேலைக்கு அமர்த்தியதாக ஆறு அறிவிப்புகளை வெளியிட்டு, பல விற்பனை நிலையங்களை மூட உத்தரவிட்டுள்ளது.

மேலும், உள்நாட்டு வர்த்தகம் மற்றும் வாழ்க்கைச் செலவு அமைச்சகம் முக்கிய விலைக் குறிச்சொற்களைக் காட்டாமையால் RM6,500 மதிப்புள்ள ஏழு அபராதங்களை விதித்துள்ளது.

மலேசிய நிறுவனங்கள் ஆணையத்தின் நிறுவன இணக்கப் பிரிவு இயக்குநர் நோர்ஹைசா ஜெமன் கூறுகையில், 115 வணிக வளாகங்கள் ஆய்வு செய்யப்பட்டு 25 குற்றங்கள் கண்டறியப்பட்டுள்ளதாகத் தெரிவித்தார்.