ஜோகூர், குளுவாங்கில் உள்ள ஒரு கல்லூரியில் பயிலும் இளம் வயது தம்பதியினர், கழிவறையில் கத்திக்குத்து காயங்களுடன் பச்சிளங்குழந்தை சடலமாகக் கண்டெடுக்கப்பட்டதை அடுத்து, அவர்களைக் காவல்துறை கைது செய்துள்ளது.

19 வயதான தாய், குழந்தை பிறந்த பிறகு என்சே பெசார் ஹஜ்ஜா கல்சோம் மருத்துவமனைக்கு அழைத்துச் செல்லப்பட்டபோதுதான், இறந்த பச்சிளங்குழந்தை கண்டுபிடிக்கப்பட்டதாக ஜோகூர் காவல்துறைத் தலைவர் அப்துல் ரஹ்மான் அர்சாத் கூறியதாக உத்துசான் மலேசியா செய்தி வெளியிட்டுள்ளது.

பெண் குழந்தையைப் பெற்றெடுத்த பிறகு, அந்தப் பெண் தனது ஆசிரியரைத் தொடர்பு கொண்டார். அவர் அப்பெண்ணைப் பரிசோதனைக்காக மருத்துவமனைக்கு அழைத்துச் சென்றார். அந்த மாணவி சமீபத்தில்தான் பிரசவித்திருந்ததும், வயிற்றில் மற்றொரு குழந்தையைச் சுமந்திருந்ததும் மருத்துவர்களால் கண்டறியப்பட்டது.

“அந்த மாணவி வாடகைக்கு எடுத்திருந்த வீட்டில் நடத்தப்பட்ட விசாரணையில், கழிவறையில் அந்தப் பெண் குழந்தையின் சடலம் கண்டுபிடிக்கப்பட்டது.” “முதற்கட்ட சோதனையில் குழந்தையின் உடலில் கத்திக்குத்து காயங்கள் இருப்பது கண்டறியப்பட்டது, இருப்பினும் மரணத்திற்கான காரணம் இன்னும் விசாரணையில் உள்ளது,” என்று அவர் கூறினார்.

விசாரணைக்கு உதவுவதற்காக, மாணவியின் காதலன் என்று நம்பப்படும் மற்றும் அதே கல்லூரியில் படிக்கும் 19 வயது இளைஞர் ஒருவரை போலீசார் பின்னர் கைது செய்ததாக ரஹ்மான் கூறினார். பாதிக்கப்பட்டவரின் மரணத்திற்கான காரணம் மற்றும் அவர் பெற்ற கத்திக்குத்து காயங்களின் எண்ணிக்கையைத் தீர்மானிக்க இன்று பிரேத பரிசோதனை நடத்தப்படும் என்று அவர் கூறினார்.

கொலை மற்றும் ஒரு குழந்தை உயிருடன் பிறப்பதைத் தடுக்கும் அல்லது பிறந்த பிறகு அதன் மரணத்தை ஏற்படுத்தும் செயல்களுக்காக, தண்டனைச் சட்டத்தின் 302 மற்றும் 315 பிரிவுகளின் கீழ் இந்த வழக்கு விசாரிக்கப்பட்டு வருகிறது. ஆண் சந்தேக நபருக்கான நீதிமன்றக் காவல் மனு இன்று தாக்கல் செய்யப்படும் என்று ரஹ்மான் கூறினார்.