மாநிலத் தேர்தல்களில் பாரிசான் நேஷனல் கூட்டணி தனித்த அரசியல் நிலைப்பாட்டை எடுத்திருப்பதால், பிரதமர் டத்தோ ஸ்ரீ அன்வார் இப்ராஹிம் தலைமையிலான ஒற்றுமை அரசாங்கத்திற்கு வழங்கிவரும் ஆதரவில் எந்த மாற்றமும் ஏற்படாது எனத் துணைப் பிரதமர் டத்தோ ஸ்ரீ அகமட் ஸாஹிட் ஹமிடி தெரிவித்துள்ளார்.

மலாக்கா மாநிலத் தேர்தலை முன்னிட்டு அரசியல் கட்சிகளுக்கிடையே கருத்து வேறுபாடுகள் ஏற்பட்டுள்ள நிலையில், அவை மத்திய அரசாங்கத்தின் ஒற்றுமையையோ நிர்வாகத்தையோ பாதிக்காது என்றும் அவர் வலியுறுத்தியுள்ளார். இதனால் பாரிசான் நேஷனல் அமைச்சர்கள் யாரும் அமைச்சரவையிலிருந்து பதவி விலக வேண்டிய அவசியமில்லை எனவும் அவர் தெளிவுபடுத்தியுள்ளார்.

அரசாங்கத்தின் மீது நம்பிக்கை இல்லாவிட்டால் நாடாளுமன்றத்தை முன்கூட்டியே கலைக்கக் கோருவதற்குப் பதிலாக ஸாஹிட் பதவி விலக வேண்டும் என டிஏபி தலைவர் கோபிந்த் சிங் விடுத்த சவாலுக்குப் பதிலளித்த அவர், “கோபிந்த் சிங் அவ்வாறு கருதினால், அவரது கட்சியின் பொதுச் செயலாளர் அந்தோணி லோக்கே செய்ததை அவரும் செய்யலாம்” எனப் பதிலடி கொடுத்துள்ளார்.

மலாக்காவில் கிராம மேம்பாடு மற்றும் பாதுகாப்புக் குழு உறுப்பினர்களுடனான சந்திப்புக்குப் பின்னர் செய்தியாளர்களிடம் பேசிய ஸாஹிட், ஒற்றுமை அரசாங்கத்தில் இடம்பெற்றுள்ள ஒவ்வொரு கட்சிக்கும் மாநிலத் தேர்தல்களில் தங்களுக்கான அரசியல் பாதையைத் தீர்மானிக்கும் உரிமை இருப்பதாகக் குறிப்பிட்டார்.

“மத்திய அளவில் பிரதமர் அன்வார் இப்ராஹிமின் தலைமைத்துவத்திற்கு நாங்கள் தொடர்ந்து முழு ஆதரவு வழங்குகிறோம். அமைச்சரவைக் கூட்டங்களில் ஒற்றுமை அரசாங்கத்தின் கொள்கைகளையோ பிரதமரின் முடிவுகளையோ பாரிசான் நேஷனல் அமைச்சர்கள் எதிர்த்ததில்லை. இதனை அனைத்து அமைச்சர்களும் உறுதிப்படுத்த முடியும்” என அவர் தெரிவித்தார்.

இதனிடையே, முன்னாள் பிரதமர் நஜிப் ரசாக்கிற்கு வீட்டுக்காவல் அனுமதி வழங்கப்பட்ட நீதிமன்றத் தீர்ப்பைத் தொடர்ந்து, போக்குவரத்து அமைச்சர் அந்தோணி லோக்கே கடந்த நவம்பர் 10ஆம் தேதி தனது பதவியை இராஜினாமா செய்திருந்தார். இந்த அரசியல் சூழ்நிலையில் ஸாஹிட்டின் கருத்துகள் வெளியாகியுள்ளன.